mammyblue2

copyright credits to hit 96.7 fm.

എരിഞ്ഞുതീര്‍ന്ന
ചാരതുണ്ടുകള്‍ ചിതറിച്ച
സ്ഫടികപാത്രത്തില്‍
ചുമച്ചുതെറിച്ച അവസാനത്തെ
തുള്ളികള്‍, ആരോ
തുടച്ചുകളഞ്ഞു.

ആഢംബരത്തിന്റെ
എല്ലാസ്മരണികകളും
ഒന്നൊന്നായി കുടിയൊഴിഞ്ഞു.

നാലുംകൂട്ടിയമുറുക്കും,
തെറുത്തതില്‍ തിരുകിയ വലിയും;
ഡര്‍ബാറും കഴിഞ്ഞ്
കാലവും കഴിഞ്ഞു.

പൊളിഞ്ഞുവീഴാറായ
വീടുകാണുമ്പോള്‍ ജനം
അയാളെയോര്‍ത്തു.
‘തറവാടിയായിരുന്നു,
സ്വര്‍ണ്ണക്കോളാമ്പിയും
സ്ഫടികത്തിന്റെ ആഷ്ട്രേയും
ഉണ്ടായിരുന്നു.’

ചില വിശന്ന വയറുകള്‍ മാത്രം
വിലപിടിച്ചവതിരഞ്ഞുപോന്നു

മൊബൈലിന്റെ ബെല്ലടിക്കുന്നു.
ഭാര്യയാണ്. പകപ്പിന്റെ സ്വരം.
വീട്ടിൽ നിന്ന് കള്ളൻ കയറിയെന്ന്! ദൈവമേ ആർക്കെങ്കിലും?
ഇല്ല. ഭാഗ്യം. ആകെക്കൂടി കരുതിവച്ചിരുന്ന കുറെ പണം അയാൾകൊണ്ടുപോയി. ആരെയും ഉപദ്രവിച്ചിട്ടില്ല. രാത്രിയാണ്, എങ്ങനെ വീട്ടിലെത്തും. അയാൾ ഉൽകണ്ഠപ്പെട്ടു. വിഷു അടുത്തുവരുന്നു. കാശിന്റെ നൂറായിരം ആവശ്യങ്ങൾ. എന്തുചെയ്യും?

“സെക്യൂരിറ്റീ, എക്സ്ക്യൂസ് മി, ഈ കാർഡ് വർക്കാകുന്നില്ല.” ശബ്ദം കേട്ട് അയാൾ എ‌ടി‌എം കൌണ്ടറിന്റെ അകത്തേയ്ക്ക് ചെന്നു. കാർഡ് തിരിച്ചിട്ടതാവണം. വീണ്ടും ഒന്നുകൂടിയിട്ടപ്പോൾ മെഷീനിൽ ഡിക്ടക്റ്റ് ചെയ്തു. അയാൾ പുറത്ത് കസേരയിൽ വന്ന് വീണ്ടും വീടിനെയോർത്ത് വേപഥുപൂണ്ടു. നേരമൊന്നുവെളുത്തിരുന്നെങ്കിൽ…

*****
നിസ്സഹായം
“സെക്യൂരിറ്റീ, ഒന്നു സഹായിക്കാമോ?”
കൈയിലൊതുങ്ങാവുന്നതിൽ കൂടുതൽ ഷോപ്പിംഗ് ബാഗുകളുമായി ഒരു സ്ത്രീ.
ബാഗുകൾ ഒരു കൈയിൽ നിന്നു വാങ്ങി. എസ്കലേറ്ററിൽ കയറാൻ കൂട്ടാക്കാതെ നിൽക്കുന്ന കുഞ്ഞിന്റെ കൈപിടിച്ചിട്ടും, കുഞ്ഞ് കൈ പിറകോട്ടുവലിച്ചു. നിസ്സഹായതയിൽ സ്ത്രീ അയാളെ നോക്കി. കുട്ടിയെ എടുത്തുകൊണ്ട് ഇപ്പുറത്തെത്തിച്ചപ്പോൾ അവർക്ക് സമാധാനമായി. അയാൾ സ്വന്തം കുഞ്ഞിനെയോർത്തു, വീടിന്റെ തിണ്ണയിലെ പടികയറുമ്പോൾ ഇന്നലെ തെന്നിവീണ് കൈയ്ക്ക് ചെറിയ പരിക്ക്. ഇപ്പോഴും വേദനിക്കുന്നുണ്ടാവണം. ഇന്നലെ കരഞ്ഞ് ഒട്ടും ഉറങ്ങിയിട്ടില്ല.

*****
ആവലാതി

“ഹേയ്! ഹൌവ്യു ഡ്യൂഡ്”

വാതിലിനരികെ അയാൾക്കൊപ്പം, ഇപ്പോ ജീൻസ് അരയിൽ നിന്നൂർന്ന് താഴെപ്പോകും എന്ന മട്ടിൽ നിന്ന ഒരു പയ്യൻ ഫോണിൽ സംസാരിക്കുകയാണ്. ഇടത്തോട്ടും വലത്തോട്ടും നടന്ന് പിന്നെ മൂൺ‌വാക്ക് പ്രാക്ടീസ് ചെയ്യുന്ന പോലെ തെന്നിയും ഉരഞ്ഞും സംസാരിച്ചും നീങ്ങി. ഇടയ്ക്ക് ഡോറിന്റെ വാതിൽക്കലെത്തിയപ്പോൾ അയാൾ വാതിൽ തുറന്നു. പാർക്കിംഗ് ഏരിയായിൽ ഒരു കാർവന്നുനിന്നതുകണ്ട് അയാൾ പെട്ടെന്ന് അടുത്തുചെന്ന് ഡോർ തുറന്നു.

“വൈ കാണ്ട് വി ട്രൈ സം ചൈനീസ് ടുഡേ?” പുറത്തിറങ്ങുന്നതിനിടെ അടുത്തിരുന്ന ഭർത്താവിനോട് സ്ത്രീ ചോദിച്ചു.

സ്ത്രീയും പുരുഷനും അകത്തേയ്ക്കു കയറിപ്പോയി. വാതിൽ അടച്ച് അയാൾ പുറത്തെ വെയിലത്തേയ്ക്കു നോക്കി. ഇന്നും ലീവ് കിട്ടിയില്ല. റേഷൻ‌കട തുറക്കുന്ന സമയത്ത് ആരെ പറഞ്ഞുവിടാൻ? റേഷനരിവാങ്ങിയിരുന്നെങ്കിൽ, ഈ മാസത്തെ ചിലവ് നടന്നേനെ.

“സെക്യൂരിറ്റീ”…..

കേരളത്തിൽ  ജനിക്കുകയും കക്ഷിരാഷ്ട്രീയം നോക്കാതെ വോട്ടുകുത്തുകയും ചെയ്യുന്ന ഒരു പാവം കേരളീയനാണ് ഞാൻ. കേരളത്തിലെ ബഹുഭൂരിപക്ഷത്തെയും തൊഴിലാളിവർഗ്ഗമെന്ന് വിളിക്കാമെന്നിരിക്കെ അതിന്റെ പരിധിയിൽ വരുന്ന ഒരാളുമാണ്. സമീപകാലത്തായി പോലീസ് പരാതിക്കാർക്കെതിരെ നടപടികൾ സ്വീകരിക്കുന്നതായി കണ്ടു. പരാതിനൽകാൻ എത്തുന്ന പരാതിക്കാരൻ പ്രതിപട്ടികയിൽ ചേരുന്ന ഈ രീതി ഒരു സാധാരണക്കാരൻ എന്ന നിലയിൽ ആശങ്കയുണർത്തുന്നു.

പോലീസിനെ ജനകീയമാക്കാനുള്ള അങ്ങയുടെ നീക്കത്തെ സന്തോഷത്തോടെ കണ്ട ജനങ്ങൾ എങ്ങനെ പോലീസിനെ സമീപിക്കും എന്നറിയില്ല. ഇനി ആരെങ്കിലും പരാതിപറഞ്ഞാൽത്തന്നെ പരാതിക്കാരന് ആദ്യം തല്ലുകൊടുക്കുന്ന ശീലമുള്ളതുകൊണ്ട് എങ്ങനെ പറയണം എന്ന് പറഞ്ഞാൽ നന്നായിരുന്നു.

ജനങ്ങളെ മർദ്ദിക്കുന്ന പോലീസിനെ സസ്പെന്റ് ചെയ്തു എന്നത് വലിയ കാര്യമായി തോന്നുന്നില്ല. കാരണം അത് അടിച്ച് നട്ടെല്ലൊടിച്ചിട്ട് സോറി എന്ന് പറയുന്നതുപോലെയാണത്. സമാധാനവും ശാന്തിയും ഇനിയെങ്കിലും കേരളത്തിൽ ഉണ്ടാകണമെങ്കിൽ വിപ്ലവപ്രസ്ഥാനങ്ങൾ വീണ്ടും വരേണ്ടിയിരിക്കുന്നു എന്നുവേണം കരുതാൻ.

വിലവർദ്ധനയോ, പട്ടിണിയോ കാര്യമാക്കാതെ ജീവിച്ചോളാം സർ. പക്ഷേ ഉപദ്രവിക്കരുത്. അങ്ങയോടുള്ള ഒരു സാധാരണക്കാരന്റെ രണ്ടുകൈയും കൂപ്പിയുള്ള അപേക്ഷയാണ്. പോലീസ് എന്നുകേൾക്കുമ്പോൾ പേടിയാണ് സർ. എന്നെങ്കിലും അവരോട് എന്തെങ്കിലും പരാതിപ്പെടുമ്പോൾ അവർ എന്റെയും ചെവി അടിച്ചുപൊട്ടിക്കുമെന്നും, നെഞ്ചിങ്കൂട് ഇടിച്ചുകലക്കുമെന്നും അറിയാം. ജീവിക്കാനുള്ള ആഗ്രഹം കൊണ്ടാണെന്ന് അങ്ങുമനസിലാക്കുമല്ലോ.

നിങ്ങളുടെ രാഷ്ട്രീയക്കളികൾ ഞങ്ങൾ ജനങ്ങൾക്ക് അറിയേണ്ട സർ. ഞങ്ങൾക്ക് സമാധാനമായി ജീവിച്ചാൽ മാത്രം മതി. ഏതു പാർട്ടി ഭരിച്ചാലും. സത്വരനടപടികൾക്ക് ഇനിയും സമയമുണ്ട്. കടിഞ്ഞാൺ അങ്ങയുടെ കൈയിൽ തന്നെ.  സാധാരണ രാഷ്ട്രീയക്കാർ ജനങ്ങൾക്കാണ് വാഗ്ദാനങ്ങൾ നൽകുന്നത്, അത് പാലിക്കപ്പെടാറുണ്ടോ എന്നത് ഇവിടെ പ്രസക്തമല്ല.

പക്ഷേ, ഇതിനൊരു പ്രതിവിധിയുണ്ടാക്കിയാൽ എന്റെ ഒരു വോട്ട് വാഗ്ദാനം ചെയ്യുന്നു സർ.

എന്ന് സ്നേഹപൂർവ്വം എന്നാണ് നട്ടെല്ലൊടിയുക എന്ന് ഭയന്നുകഴിയുന്ന ഒരു ഹതഭാഗ്യൻ.